ABAM-i Ao osangtajung ken kaket mapangshia nübo aser rongsen jenti indoka tajungba küma yanglushia amshia arur tan agi 10 ben tashi yanglushiogo. ken tasen aika inoksema lir aser temelenshi tesem aisü nung melenshia yanglushia alinung, arogo ajak nung lirumedema tajungba nung tentettsü asoshi ABAM-i osangtajung ken bushiba sentong Ao Baptist arogotem zone wise lemsar yangluba zone 1-4 August 27 & 28, 2018 Impur nung kanga junga agiogo. Ajak agi arogo 60 nungi Music Director aser choir mastertemi anir nisung 150 arua iba sentong nung shilem agi. Iba sentong nung osangtajung ken kaket 10th revision committee aser KABA music committee ajanga sayua liasü.

Tayongzükba agütsüba mapang Rev. Dr. Mar Atsongchanger Executive Secretary, ABAM ajanga ken ajakji nüjidong kaka lia ken mejemeri mejema lir, asenoki ken atenba mapang ken mejemer nükla aser nüjidong angateta tenra ken ajak jagi asen den jembitsü aser nai ken sayuba mapang lokti koba nung südir süang, ken ajanga tazüokba tajungi arua lokti aser kija taküm temlenshiba nung Tsüngremer temoatsü agitettsü ta ayongzük.

Iba sentong nung len sayur Rev. Arenla Longchar KABA liasü aser la ajanga nisung ajak pei saseb terok junga lir, anungji ni ken matener ta atsüayong mesüi pei akokba nung ken ajanga kulisütsüla ta shia liasü. 

Maneni amangba purtem ajaki iba osangtajung ken atenba ajanga Tsüngremer temoatsü agitsü tamang sarasadem ayur.